Sundlaugar er víða að finna á Vestfjörðum bæði í byggð, við gamla héraðsskóla eða yfirgefnar einar úti í náttúrunni. Þær eru eins mismunandi og þær eru margar og því fannst okkur spennandi að taka hring um svæðið til þess að fanga þennan fjölbreytileika. Það var ekki einungis fegurð lauganna sem heillaði okkur heldur er mikil og skemmtileg saga um sundmenningu okkar íslendinga á bakvið margar þeirra. Við mælum með að fara þessa ferð á 6 dögum fyrir bestu upplifunina.

A. SUNDLAUGIN Á HÓLMAVÍK

Á Hólmavík er mjög góð sundlaug sem er opin allt árið um kring og hefur laugin allt það helsta sem maður sækist eftir í sundlaug. Það var gott að byrja ferðina á einni góðri laug með góðum sturtum eftir keyrsluna frá höfuðborginni. Í lauginni er 25 metra sundlaug, tveir heitir pottar, buslulaug og gufubað. Laugin er mjög nýleg en hún opnaði árið 2004 en þar á undan fór fólk í sundlaugina á Laugarhóli til þess að fara í sund og var því tilvalið að kíkja næst þangað.

B. SUNDLAUGIN LAUGARHÓLI

Sundlaugin við Laugarhól var afar sjarmerandi. Á svæðinu er ekkert kalt vatn heldur einungis heitt. Vatnið er 42 gráður og þarf því að kæla það örlítið niður svo hægt sé að baða sig í því Laugin stendur við hlið Hótel Laugarhóls og var byggð á árunum 1943-1947. Áður var þessi staður heimavistaskóli fyrir börn og þurfti því laug fyrir nemendur til þess að æfa sund. Framkvæmdin var að mestu unnin í sjálfboðavinnu en engar vélar komumst um fjörðin og var þetta því mikið þrekvirki. Við hittum þarna mjög almennilega konu sem sjálf hafði verið í þessum heimavistaskóla til 12 ára aldurs. Klefarnir eru góðir en skammt fyrir ofan sundskýlið er Gvendarlaug hin forna sem er náttúrulega heit uppspretta sem var blessuð af Guðmundi góða fyrrum hólabiskupi í byrjun 13. aldar. Þessi heita uppspretta var endurhlaðin á níunda áratug síðustu aldar og er nú friðlýst og fer maður því ekki ofan í þessa laug en vatnið þaðan blandast samt sem áður við vatnið í sundlauginni og heitu pottunum svo maður missir ekki af tækifærinu á því að baða sig í blessuðu vatni. Vatnið á að hafa lækningarmátt og er sérlega heppilegt gegn augnsjúkdómum. Þegar við vorum á svæðinu var veðrið gott og lítið um gesti og var upplifunin því dásamleg. Vatnið í lauginni var mjög passlega heitt og hefði maður geta legið þarna í mjög langan tíma. Vatnið í pottunum við hlið laugarinnar var hins vegar heitara. Laugin er opin allt árið og kostaði einungis 600 krónur að fara í hana.  

C. POTTARNIR Á DRANGSNESI

Næst var förinni heitið á Drangsnes en í fjörunni þar eru þrír heitir pottar með útsýni yfir sjóinn. Þetta er mjög sjarmerandi og skemmtilega öðruvísi. Þú ferð í pottana á eigin ábyrð og það kostar ekki krónu. Hinum megin við veginn eru klefar þar sem þú getur skipt um föt og síðan stokkið í pottana og horft yfir sjóinn, bryggjuna og Grímsey. Þetta eru þrír frekar venjulegir heitir pottar og því klárlega hægt að eiga skemmtilegar potta samræður við fólk sem maður hefur eflaust ekki áður hitt.

D. REYKJANES

Við gamla Héraðsskólann í Reykjanesi er 50 metra löng sundlaug, sem áður var skólasundlaug. Í dag er þarna rekið hótel. Vatnið er heitt og er tekið fram að það geti orðið of heitt í sumum tilfellum og þarf maður því að hafa varan á. Vatnið er það heitt að segja má að þessi laug sé stærsti heiti pottur landsins.
 

At the old school in Reykjanes is a 50 meter long swimming pool, which used to be a school swimming pool. Today there is a hotel. The water is hot and can somtimes get too hot so you need to be careful. The water is so hot that you can say this pool is the biggest hot tub in the country.

E. HEYDALUR

Við gátum ekki farið á Vestfirði án þess að kíkja við á sveitahótelið í Heydal. Í gróðurhúsinu þar á bæ er lítil sundlaug og heitur pottur en þetta gróðurhús var áður fjárhúsið þar á bæ. Holan sem sundlaugin er ofan í var því þegar til staðar og þar sem heitt vatn var á svæðinu þá fengu eigendurnir þá hugmynd að fylla holuna af vatni og þar með útbúa þessa einstöku sundlaug. Þetta gerðu þau í kringum árið 2007 en þau tóku við sveitabænum árið 2003. Okkur finnst þetta afar sniðug nýting á rýminu og skemmtilegt hvernig tilgangur þessarar holu getur breyst frá því að geyma skít og drullu yfir í það að verða staður þar sem fólk baðar sig í. Allir í Heydal tóku vel á móti okkur bæði menn og dýr en inní gróðurhúsinu var lítil sæt kisa sem veitti okkur félagsskap allan tíman.

F. SUNDLAUGIN BOLUNGARVÍK

Sundlaug í Bolungarvík var fyrst byggð af Ungmennafélagi Bolungarvíkur árið 1932 og var þá fyrsta kolakynta sundlaug landsins. Sú sundlaug var hætt í notkun árið 1969 og því augljós vöntun á nýrri laug bæði fyrir nemendur en einnig sjómenn. Nemendur þurftu á þessum árum að keyra yfir til Ísafjarðar til þess að fara í skólasund sem var bæði dýrt og hættulegt. Ný og betri laug var tekin í notkun árið 1977 og var hún teiknuð af  Jes Einari Þorsteinssyni. Síðan þá hefur mikið verið byggt við laugina sem er kölluð Musteri vatns og vellíðunar. Nafnið er viðeigandi og er gott að koma þarna við eftir nokkrar heimsóknir í sveitasundlaugarnar á Vestfjörðum. Þarna er allt til alls og mjög góð saunu aðstaða þar sem maður getur slakað á.

G. REYKJAFJARÐARLAUG

Í Reykjafirðinum við Arnarfjörð eru tvær heitar laugar. Önnur er gömul steypt sundlaug en aðeins fyrir ofan hana er lítil náttúrulaug. Sagt er að hitinn í laugunum sé 40 gráður allt árið en við erum sannfærðar um að hitinn hafi verið yfir það. Útsýnið úr steyptu lauginni er gífurlega fallegt. Við laugina er búningsaðstaða en engar sturtur. Þetta er því mikil sveitastemnning enda kostar ekki neitt að fara ofan í.

H. POLLURINN

Pollurinn á tálknafirði er mjög fallegur staður til að stoppa á. Á staðnum eru tveir pottar til að sitja í en sá þriðji er aðeins dýpri. Búningsklefi og sturta er á staðnum og er því viðhaldið af hreppnum.
Pollurinn býður því uppá frjáls framlög og dósa söfnunin á svæðinu gefur til kynna að hægt er að njóta sín vel í pollinum á góðu sumarkvöldi.

I. Sundlaugin í Laugarnesi

Þessi laug er staðsett á fallegum stað í Laugarnesi við Birkimel. Hægt er að fara í litlu steyptu sundlaugina en einnig er lítil minni heitur pottur aðeins neðar við hana. Útsýnið yfir Breiðafjörðinn gerir heimsókn í þessa laug algjörlega þess virði. Þegar við komum á staðinn voru klefarnir lokaðir vegna covid svo við náðum ekki að kíkja á aðstöðuna þar. Einnig er hitastigið á lauginni breytilegt. Laugin er yfirleitt heitari en potturinn og getur hitastigið verið allt frá 30 til 37 gráður og er hitastigið veðurtengt þar sem vindkælingin er mikil. Hún var því full köld líkt og veðrið þennan daginn en engu að síður gífurlega fallegur staður til þess að kíkja á.

J. Flókalaug

Eftir mikla keyrslu um Vestfirðina var viðeigandi
að enda þessa ferð á Flókalaug í Flókalundi ekk langt frá sundlauginni í Laugarnesi. Sundlaugin er í sumarhúsabyggðinni og er því tilgangur hennar samverustaður fyrir fólk sem er í bústað þar sem ekki allir eru með heitan pott í garðinum. Þrátt fyrir það eru allir velkomnir. Andrúmsloftið var rólegt og í lauginni eru fallegir gluggar til þess að virða fyrir sér útsýnið.